Yeroon Waaqayyoo yeroo keenya waliin garaa garummaa guddaa qaba. Al tokko tokko yeroon keenya yeroo Waaqayyoo nutti fakkaata, yeroon Waaqayyoo immoo yeroo keenya waliin tokko nutti fakkaachuu dhiisuu mala. Milkaa’umsi jireenya keenya irratti nuti argannu yeroo Waaqayyoo nutti fakkaata; yeroo wanta nuti hawwine tokko ta’uu didu ammoo yeroon Waaqayyoo waan hin geenyeef nutti fakkaata. Kana yeroon jedhu Waaqayyo yeroo keenya hin kabaju jechuu koo miti; hata’u malee akkamiin yeroo Waaqayyoo isa sirrii eeguu qabnaree?
Kanaafis Waaqayyo yeroon isaa yommuu ga’u akka ol isin qabutti, harka isaa isa aango-qabeessa jalatti gad of deebisaa
1 Pheexros 5:6
Kutaan dubbii Waaqayyoo kun akka nutti himu yeroo Waaqayyoo wanti jedhamu tokko jiraachuu isaati. Darbees akkaataa nuti yeroo sana eegganu nu hubachiisa. Akkaataan nuti itti yeroo Waaqayyoo eeggannus jireenya gad of deebisuu shaakaluu akka ta’e ifa godhee nuuf kaa’eera.
Hundi keenya jireenya keessatti waqtii adda addaa keessa darbina. Yeroon dhalachuu, yeroon du’uu; guyyoota boo’ichaa fi guyyoota kolfaa; guyyaa wantooti itti xumuramanii fi guyyaa wantooti haaraan itti jalqaban akka jiru dubbii Waaqayyoo Macaafa Lallabaa 3:2-8 irraa barachuu dandeenya. Gabaabumatti jireenyi biyya lafaa kun yeroo gaarii fi yeroo ulfaataa ta’een kan guutamedha. Hata’u malee, yeroowwan kana hunda gidduutti Waaqayyo yeroo hundumaa ijoollee isaa ilaalaa jira. Sunis si dabalata!
Abdii fi obsaan yeroo Waaqayyoo eeguun, waan hundumaaf yeroo hundumaa fuula Waaqayyoo duratti mudaa akka hin qabnee fi gaarummaa Waaqayyo isa barabaraa guutummaatti akka argannuu fi bira geenyu nu gargaara. Nuti guutummaatti to’annaa Waaqayyoo jala jirra.
Yeroo Waaqayyootti Maaltu Nuuf Ta’a?
Yeroo Waaqayyootti isa nuti isarraa dhageenyee fi abdiin eeggannu tokkotto nuuf ta’a. Utuu hin beekin ganama tokko misiraachoo haaraa dhageenya. Akka tasaa karaa nuti hin eegneen Waaqayyo isa dursee nuuf yaade sana nuuf raawwata. Yeroo Waaqayyootti kadhati keenya yeroo dheeraa akka jaalala Waaqayyootti nuuf deebi’a. Yeroo Waaqayyootti waan jireenya keessatti nuti kana dura hin shaakalle tokkotu jalqaba.
Yeroo Yeroo Caalu
Waaqayyo abbaan keenya abdii hin moofofnee fi hin dabarre nuuf kennee jira. Innis abdii jireenya barabaraati. Abdiin nuuf kenname kun amanamaadha, nu hin yellaasisus. Biyyi lafaa kun guutus hir’atus, kan hin hir’annee fi gadi dhumaa hin adeeemne garuu abdiin biiftuu olii tokko jira. Innis gara mirgaa abbaa, Kristoos wajjin taa’uudha. Kunis amantoota hundumaaf yeroo Waaqayyoo isa hundummaarra caaluu fi abdiin eegamu dha.
Yaada kenni